Орталық аудандық кітапхана өлкеміздің ақыны, педагог, Қазақ КСР Халық ағарту ісінің үздігі Манап Қабдөшқызы Ысқақованың өмірі мен шығармашылығына арналған «Ұстаздықты ақындыққа ұластырған» атты әдеби библиопанорама өткізді.

Іс-шара музыкалық әуенмен басталды: «Туған жер» (өлеңнің сөзі М.Ысқақованікі) әні шырқалып, экраннан Манап апайдың туған жеріне және өмірінің жарқын сәттеріне арналған фотосуреттер көрсетілді. Кітапханашылар қонақтарды қарсы алып, кездесудің бүкіл өмірін балаларға, поэзияға және туған жеріне арнаған аяулы жанның жарқын естелігіне арналғанын атап өтті. Библиопанорама барысында тыңдаушыларға Манап Қабдөшқызының өмірбаяны жан-жақты таныстырылды. Онда оның Қарағаш ауылындағы балалық шағы, педагогикалық қызмет жолының басталуы, түрлі мектептердегі ынталы еңбегі және бастауыш сынып мұғалімі ретінде жинақтаған қырық жылдық бай еңбек өтілі қамтылды. Көрермендерге сондай-ақ оның отбасы жайында, жұбайы Мағжан Ғалиасқарұлы Рахимовпен құрған берекелі шаңырағы, бала, немере және шөбере тәрбиелеудегі өнегелі үлгісі туралы мағлұмат ұсынылды.

Кеш барысында ақын шығармашылығына айрықша мән берілді. Көрермендер оның «Тілашар», «Көңіл толқындары», «Табиғат – біздің үйіміз», «Балаларға базарлық» және өзге де жыр жинақтарымен тереңірек танысты. Ақын туындыларынан алынған әсерлі дәйексөздер Отанға деген шынайы сүйіспеншілікті, адамгершілік пен ізгілікті, ұрпақ тәрбиесіне деген жауапкершілікті, сондай-ақ табиғаттың өлшеусіз көркемдігін ерекше айшықтап көрсетті.

Бағдарлама мазмұнын жандандыру мақсатында Манап апайдың өзі құрастырған жұмбақтар негізінде интерактивті викторина ұйымдастырылды. Қатысушылар бұл бөлімге белсене атсалысып, тапқырлықтарын, сөз өрнегін терең түсіну қабілеттерін көрсетіп, жұмбақтардың шешуін қызығушылықпен тапты.

Іс-шараның екінші бөлімінде арнайы шақырылған қонақтар — Тасымова Ф.М., Ахметова З.М. және Манап Қабдөшқызының немересі Рахимов Валихан сөз сөйледі. Олар ақын-ұстаздың педагогикалық шеберлігі, адамдық болмысы, мейірімі мен талапшылдығы туралы жүрекжарды естеліктерімен бөлісті. Көрермендерге оның өмір жолы мен шығармашылығына арналған бейнеролик ұсынылып, залда ерекше жылылық пен құрметке толы әсерлі атмосфера орнады.

Соңында кітапханашылар Манап Қабдөшқызының — нағыз Ұстаздың жарқын үлгісі екенін, оның мол мұрасы шәкірттерінің жүрегінде, сондай-ақ өлеңдерін білетін барша жанның санасында өмір сүре беретінін атап өтті. «Туған өлкем, қандай көркем» атты кітап көрмесіне шолу жасалды. Іс-шара бір минут үнсіздікпен және қатысушыларға айтылған алғыс сөздерімен тәмамдалды.